2010年10月21日 星期四

Hō͘ bô-kàu tōa (刊tī 2010/12 台文Bong報171)

Thàu-chá iah chhìn-chhìn ê sî
Lán chhù-piⁿ tio̍h khai-sí cháu-chông
Ā bô kóng án--choáⁿ
Chhia-lō͘ khah hn̄g hia mā sī
o͘-tó-bái kap o͘-tó-bái chhá-chhùi
bô-êng chhih-chhah
Ke-kiám kúi-chiah-á kiau-á khah hûiⁿ-pà
Ta̍k-lâng bīn-chhiuⁿ lóng hoáⁿ-hoáⁿ
Bô ōe bô kù, ā bô sio-chioh-mn̄g
Kai thiⁿ-kng iah-bōe kng

keh-piah in káu-á-kiáⁿ kan-taⁿ ti̍t-ti̍t ai
Kiaⁿ bô-lâng thang chiàu-kò͘ sioh
Lí khoàⁿ iá-tē ê chiáu-á
Bô-hoân bô-ló khai-sí kiò koa
o͘-hûn gōa ê ji̍t-thâu hòng-siā
Jit-chhiu-á phah tī thang-á gōa
Kā hit-keng kē-biō-á phah kah o͘ hoán âng
Chit sî,chōe-hòe-lâng bīn-á sió-khóa âng-âng
chhiú giâ chheng-hiuⁿ 3 châng siam thiⁿ
se̍h-se̍h liām ê chhùi-khang tiām-chiⁿ
Bīn-phôe bán-chhoah

Soa-soa 1 chūn hō͘ lo̍h--lo̍h-lâi
Bōe-hù thang moa ê hō͘-moa iah kòa tī thih-thang-á
Chu-pau m̄-kiaⁿ
chhiàu-siông chhui kiâⁿ
In bú--á saⁿ-ki khan lâi am
Chit chái-khí koe-á-lō͘ sit kong-chhái
Hoáⁿ-hoáⁿ kah chang-hng sio-siâng
kan-taⁿ chhiⁿ-âng-teng bô sóa bô cháu
Ilāu-sîn-chāi-chāi khiā teh lō͘-thâu
Kim-kim chiàu-khoàⁿ
ji̍t-ji̍t koáⁿ-kông ê lō͘-toaⁿ
Ūi siáⁿ-mih

Hō͘ bô-kàu tōa
khoàⁿ bōe tio̍h kheng
Hō͘ bô-kàu tōa

沒有留言:

張貼留言

Iū-koh leh siá he ah

 Iū-koh leh siá he ah bô thâu bô bóe Khoài pō͘ oh kái--ê  In-iû lâng bat  kā i kiò-chòe si-jîn sim-koaⁿ tòe kha-chhng phû kah pòaⁿ-thiⁿ-tén...